إذا ربنا كرمنا ورشحنا لمنصب الوزارة، وعملوا لنا امتحان واللي ح يطلع الأول هو من سيكلفونه بالوزارة، ياتري الامتحان حا يبقي شكله وأسئلته عاملة ازاي؟ أنا متخيل صيغة وأعتقد أنكم ستوافقونني عليها. الأسئلة أكيد كلها ستكون اختيارية علشان الوقت وماتتعبش السيد الوزير المحتمل في اللي اسمه إيه ده.. آه.. التفكير وإليكم نموذج الأسئلة والاختيارات المتاحة: * السؤال الأول: منذ متي وأنت عضواً في الحزب؟ منذ ١٠ سنوات. ٢- منذ ٢٠ عاماً. ٣- وعيت علي الدنيا لقيت نفسك عضو في الحزب. * السؤال الثاني: لو حصلت كارثة في الوزارة تعمل إيه؟ ١- تتقدم باستقالتك. ٢- تطنش. ٣- تصرح بأنك ستعاقب المقصرين فور عودتك من المصيف. * السؤال الثالث: لو الضغوط زادت والصحافة قطعتك تعمل إيه؟ ١- تتقدم باعتذار واستقالة. ٢- تطنش أكتر. ٣- تكلم أصحابك في الصحف القومية يشنوا حملة مضادة. * السؤال الرابع: لو سألوك عن أداء الوزارة قبل عهد سيادتك الميمون تقول إيه؟ ١- جيد. ٢- به الكثير من العيوب. ٣- زفت منيل بقطران. * السؤال الخامس: لو سألوك عن أداء الوزارة بعد ما سيادتك مسكت الوزارة تقول إيه؟ ١- زي ما هي. ٢- أزفت من الأول. ٣- غير راض عن الأداء بس إحنا كنا فين وبقينا فين...!! * السؤال السادس: إيه رأيك في أحوال الشعب المصري؟ ١- حالتهم تصعب علي الكافر. ٢- حالتهم ضنك. ٣- زي الفل بس بيتدلعوا قوي. السؤال السابع: لو اتحطيت في موقف لازم تختار فيه بين مصلحتك ومصلحة رؤسائك ومصلحة الشعب ماذا تفعل؟ ١- تضحي بنفسك وبرؤسائك علشان الشعب. ٢- تضحي بالشعب وبرؤسائك علشان نفسك. ٣- تضحي بنفسك وبالشعب علشان رؤسائك. انتهي الامتحان ولكن تبقي ملحوظة مهمة جداً: الإجابة الثالثة في كل الأسئلة هي الإجابة اللي بتوصل للكرسي، ولكنها لن تكون أبداً الإجابة الصحيحة. م. أحمد عبدالغني
|